飲茶、拜山

　　話說星期二早上，約了Uncle L上公司簽文件，簽妥閒聊，Uncle L就問，知唔知老闆喺邊，我便回說今天他老人家約了親人前往拜祭先人，Uncle L聽罷，連忙與老闆通電，說稍後一同前往拜祭云云。

　　約早上十時半左右，Uncle L 來電，說約了老闆在美孚飲茶，叫我一起前往，以下便是當時的通話內容：↓

Uncle L：「喂，亞Kent，我約咗你老闆喺美孚飲茶噃，不如你都出埋來啦！」
本人：「吓，佢今日拜山喎！」

Uncle L：「唓，飲完茶先去拜啫，嗱，我而家去攞位，你到咗美孚打電話畀我啦！」
本人：「．．．我都係唔來啦，啱啱先食完早餐，咁早邊食得落嘢呀！」

Uncle L：「唓，橫掂都冇乜嘢做，嚟坐吓傾吓偈啦！」
本人：「．．．唔係呀，我陣間要攞埋尐嘢出去畀會計師，如果出來飲茶，佢都唔知坐到幾時，你都知佢嗰個係糯米籮柚來架啦！」

Uncle L：「得架啦，飲陣間茶我會叫走架啦！」
本人：「．．．咁，去邊間呀？」

Uncle L：「桃源呀，你到咗畀電話我啦！」

　　就係咁，我就攞齊尐文件，準備飲完茶就出去辦事。到咗美孚桃源，搵勻成間酒樓都唔見人，就連忙打電話畀Uncle L。

本人：「喂，我到咗咯喎，你哋喺邊張枱呀？」
Uncle L：「我而家來緊，你打電話問你老細啦！」
本人：「．．．（心諗，你又話來攞位先嘅！）」

連忙打電話問老細，電話接通。

本人：「老細，你而家喺邊呀？」
老細：「我而家喺美孚囉！」

本人：「我到咗桃源咯喎，都唔見你哋嘅？」
老細：「唔係啩，你有無搵錯地方呀，喺大家樂隔離嗰間喎！」

本人：「係呀，我而家咪喺嗰度囉，你喺邊張枱呀？」
老細：「．．．乜嘢枱呀，我喺地下喎，你喺邊度呀？」

本人：「我喺二樓囉，乜地下都係嘅咩？」
老細：「你上去二樓托ｘ呀！」

本人：「吓，Uncle L話約咗你喺度飲茶架嘛！」
老細：「飲茶？佢都Short Short哋嘅，而家飲茶，咁幾時至去拜山呀，唔通等到黃昏至上山拜呀！」

本人：「咁．．．咁我而家落返來啦！」😓

　　無幾耐，Uncle L打電話來（當時我坐喺架車度，見到佢一路走，個肥肚腩就一路盪來盪去）。

Uncle L：「亞Kent，我就到啦，你哋喺幾多號枱呀？」
本人：「我見到你啦，你唔使走，我而家喺老細架車度呀！」

Uncle L：「吓，乜唔係去飲茶先咩？」
本人：「唔知呀，你同我老細講啦！」

　　結尾都唔使點講，就係咁，個日焗住攞住啲文件入咗去和合石度，首先就拜佢個亞嫲，跟住就到佢老豆，然後就到佢老母，每拜完一個山墳，佢個細妹就畀番一封利是過我哋，到全部搞掂，都成下午四點幾鐘，五點零鐘就車到沙田食飯，食完飯重要返公司攞番尐嘢至走得，估唔到飲餐茶，竟然變咗拜山，重要一次過拜三座咁多。😈