蓮香樓午膳

　　今日過灣仔做嘢，做完就搭「叮叮」落蓮香樓食飯，一上樓梯，見到有個「吉」位，即時標埋去坐低，坐定定後至發現，原來隔離座咗位靚女，本來都冇乜嘢嘅，但係當佢用手拎起個茶盅斟茶時，尐茶水就四圍飛，搞到成檯都係，我就梗係第一時間側側身避開啦，而佢就用好特別既眼神嚟望我，喂，大姐，自然反應嚟架，調轉係妳，妳都係咁啦，係咪？😁

　　唔知佢係咪當黑，定係個伙記玩嘢，到翻水時，個伙記就幫佢沖到滿，冚返個茶蓋，尐茶就多到流出嚟，最慘既係，個茶盅熱到燙手，點斟？😈

　　我就冇佢咁好氣，第一時間就叫碗义燒飯先，呢度既义燒肥瘦適中，一碗二舊（不切），到此必食，跟住就整多籠懷舊魚翅餃，最後竟然畀我食到豬膶燒賣，不過今日蒸得過火，硬實實，埋單66大洋，正！😎