點心逐件計

　　今日行開某地，見到有間酒樓，門面睇落唔錯，咁就行咗入去飲茶，坐低冇幾耐，隔離檯有個大嬸落點心，唔夠一陣，個部長就走埋嚟問佢：「你哋係唔係叫一個叉燒飽呀」，個大嬸話係。起初我重以為自己聽錯，但係到尐點心送埋去時，個大嬸就鬼殺咁嘈：「點解成籠淨係得一個叉燒飽架！」。😁

　　睇真尐，原來呢間酒樓有張好特別既點心紙，係逐件計嘅，咁啱個大嬸無睇清楚，見到點心紙就劃，人哋去問佢佢就求其答人，所以至攪出個咁既笑話。只見佢一路食就一路哦：「咁我頭先叫尐腸粉，陣間會唔會只得一條嚟架！」😈，聽到呢度，我都忍唔住笑咗出嚟。

　　話時話，我咁大個仔，都係第一次見到尐咁攪笑嘅嘢，聽講喺上世紀五、六十年代果時，由於生活艱苦，至會有大飽逐個計嘅情況出現，估唔到而家竟然有酒樓舊調重彈。