傻佬今日好開心

　　唔知點解，自從上月在元朗某銀行外接過財神廣告後，直到而家，每日都覺得好開心，但係今日嘅開心指數，簡直係到達了爆燈階段。

　　今早十時起身去飲茶，開頭都唔覺嘅，到食件燒賣時，嘩，個心竟然有種滿足嘅感覺，跟住埋單，個靚女竟然同我講，新年快樂，重叫我去行花市添，個刻心情，真係靚到暈。

　　咁嘛聽個靚女話，坐地鐵去維園囉，一入到去，就見到有鮮榨蔗汁賣，即刻買返樽來飲先，嘩，雖然要成十五蚊雞，但係一飲落口，就真係由個心甜出來架😍，跟住見到成排都係花，唔知點解，個心竟然笑出嚟，攪到隔離果位大嬸窒咗一窒😊。行行吓，竟然見到個大叔攞部Leica出來影花，只見佢紥住個四平馬，好似好辛苦咁，個心就突然好開心😈，跟住繼續前行，又見到有冰糖葫蘆賣，十蚊雞一枝，以前未試過，咁又買咗枝來食吓，一入口，果種又酸又甜又凍既感覺，簡直係筆墨所難形容😍，繼續行，竟然見到好多細路仔手執吹氣豬肉刀，到最後，先至知道呢把刀嘅名堂，原來佢叫做“大有斬獲”刀😁。

　　今次行花市，真係要步步為營，格外小心，因為周圍都係“大有斬獲”刀、高達死光劍、狼牙棒等等．．．真係一個唔覺意就會中招，但係呢尐都係碎料，最難避嘅係果尐吹氣長頸鹿，就算你同佢隔住二個人都要中招，至於另一種就係戴係頭上既財神頭箍，唔好睇佢細細件，無乜殺傷力，佢果對官帽後既耳仔真係唔講得笑，我就曾經見到戴住佢嘅人突然轉身，咁就一野打落後面果位人兄塊面度😂。

　　嘩，行行吓，竟然又俾我見到尐好好味既缽仔糕喎，四蚊雞，拿拿林即刻整件；行唔夠二個街口，竟然又俾我見到賣四蚊雞嘅潮洲糖葱餅，喺先前見到要成五蚊雞架，真係諗都唔使諗，即刻整件嘆吓😍。

　　行咗接近二個鐘，尐人就越來越多，當我睇見尐成副架生嘅師兄，孭到身水身汗，疲態盡出，重要一路行一路保護尐器材時，個刻直頭開心到暈，因為今日我真係乜都無帶，齌行😈。

　　行完花市就行落去灣仔，去到檀島就叫杯凍茶同蛋撻，當尐野送埋來時，咁就不由自主咁笑咗出來，攪到個伙記速走😁，食完野就搭地鐵回家，諗返頭先嘅嘢，都唔知點解，係架車度就一路企一路陰陰咀笑，到我回過神時，竟然見到前面位姐姐仔望住我笑．．．😂，嘩，今日真係開心死呀😁