我用開嘅股票機，佢有時真係會畀到尐驚喜你，就好似今早咁，『建行』無喇喇就由昨天收市價５個幾，升到開市前買入價接近１９０大元（見附圖），真係睇見都覺開心。
不過呢尐嘢試過幾次，就真係見怪不怪囉，記得第一次遇到以上情形，果時個心真係「噗噗」聲咁猛跳，但個次唔算經典，因為個次手持隻股票數量雞碎咁多，而個股價又唔係升得咁勁，只係幾倍度，之不過都令我開心咗成．．．個鐘頭。
事隔幾年，另一次就犀利囉，那次手持重貨，個股價就由幾亳子變成幾蚊，當時第一個念頭就係想同老細講拜拜，提早退休，好彩我放貨時先知道係乜嘢一回事，更好彩嘅係，個日老細無返工，如果唔係，就真係畀佢害死囉。😜
唔知係唔係人年紀大咗，心態已經有尐唔同，喺今次金融風暴前又發生咗同類事件，今次就清醒好多，在未經証實之前，個心已經諗到，就算今次係真，以後都要做嘢架，成日放假旅行都好悶啫，所以心情就無乜特別，之不過最後証實都係流嘅，個心當時真係有尐唔舒服架。
曾經同朋友提起，佢反問我點解唔轉過個服務商，我就同佢講，我唔係唔想轉，而係另一服務商嘅機係要叉電，而且重要隔日叉添，我份人就最怕麻煩，部手機一個星期叉一次我都嫌煩，更何況係隔日。而且佢又會失驚無神咁畀啲驚喜你，淨係呢樣，已經唔捨得轉啦！😁
果 時、 果 次。
回覆刪除試下讀呢句：「一個個排好。」就知個正字點寫喇。
鷄
你出個個係俗字，個正字係咁寫架 -->“雞”。
[版主回覆06/20/2009 11:33:00]你出個個係俗字，個正字係咁寫架 -->“雞”。 喂, 我係俗人, 咁, 寫尐俗字都好應該吖 , 唔知咁樣反駁得唔得呢?
我唔睇呢尐機嘅，我一般都設定好個上、下限畀個經紀，價位一接近個限價，經紀就會聯絡我來確認個價位有否更改。
回覆刪除[版主回覆06/20/2009 11:28:00]其實我都係每日三餐至睇, 即係早餐、午餐同晚餐。基本上我上網都有免費股價睇, 呢部機用咗十多年, 係因為感情問題至由佢留低啫。