佰年老店、呃呃騙騙（下篇）

 　　今次就講埋取銷電話直線嘅事，以前就曾經試過取銷直線，喺電話度叫佢取銷，佢就話要填Form至得，到填完fax番畀佢，過咗一輪，竟然又收到賬單，追問下佢又話從未收過，就係咁又要白白交多一個月月費畀佢。今次打電話上去，情況一樣，我就問佢你門市喺邊度，以下就是當日嘅對話內容：↓

筆者：「請問你地嘅門市喺邊？」 
接線員：「點解要問門市地址呢？」

筆者：「因為我想將份表格直接交去囉！」 
接線員：「你唔使咁麻煩嘅，填完後可以直接fax番畀我地就得啦！」

筆者：「我知，但係我以前試過，fax咗畀你地，你地話未收過吖嘛！」 
接線員：「哦，你唔使驚，我寫低我嘅fax號碼，你只要喺張form度寫低你嘅電話，寫明收到後聯絡番你，咁我收到你份傳真，就會第一時間搵你架啦。」

筆者：「OK!」

果然佢真係覆返個電話畀我，這位接線員服務態度，抵讚！👍

　　到電話到期嗰日，我就嘗試打返佢個號碼試吓，一打之下竟然打得通喎，咁即係未取銷啦，連忙打電話上去追問，今次呢位接線員嘅水準，同上一次嗰位就真係天差地遠，以下為當日嘅談話內容：↓

筆者：「我想問點解個電話重未取銷到嘅？」 
接線員：「（等了一陣）睇返記錄，我地未收到你嘅有關要求喎！」

筆者：「吓，唔係啩，我已經fax咗份form畀你地嗰囉喎，而且你地重話已經收到添！」 
接線員：「請問你fax咗畀邊位？」

筆者：「我fax咗畀你地位X生，內線電話係XXXX」 
接線員：「（等了一陣）睇番你地個電話係合約未完，要到出年9月至到期喎！」

筆者：「（個心窒一窒）吓，唔係啩，我以前check過係無約架喎？」 
接線員：「（好肯定咁講）係有約嘅！」

（因為單嘢唔係我跟開，以前有無簽約，真係唔敢肯定，但無理由早前問佢地嗰時，佢地都話無約架！）

筆者：「．．．咁，唔該妳fax番張合約畀我睇吓！」 
接線員：「（靜止了一陣）係無合約嘅。」

筆者：「（真係火都來埋）咁妳頭先又話有合約！」 
接線員：「係無約嘅！（一副完全無事嘅口吻）」

筆者：「咁即係幾時至可以取銷到個電話呀？（而家重唔有咁惡得咁惡呀）」
接線員：「最快聽日取銷到架啦！」

筆者：「乜嘢叫最快呀，咁如果唔最快要等到幾時呀？」 
接線員：「聽日可以取銷到個電話架啦！」


　　對話到此結束，到了隔日，個電話果然取銷咗，而家就等緊佢退返尐錢返嚟！（希望啦）

　　一間大店，竟然用埋呢啲鬼祟技倆，醜唔醜架，如果你話回歸之後競爭大咗，生意唔好，就來無飯開，你嘛老老實實咁同我講囉，一仟幾佰我實捐畀你嘅，使唔使連人格都出賣埋呀，今次單嘢就話係我跟啫，如果由其它同事做，咁嘛有排都取銷唔到，慢吓手到出年9月，你又話我簽咗約要到2047年6月30日至到期，因為根據基本法規定，50年不變吖嘛，笨！😈